头长而方富贵久长，头长而圆衣禄绵绵。
头部长而方，长而圆、并唔系淨止长带方，长而带圆，重包括前额、顶门、后枕、侧脑四个部份，有呢四个部份而又饱满的，富贵长久，绝不出奇，例如林肯，头长而圆就缺乏脑门，所以无贵。
头短而圆终有衣禄，头短而扁困顿难免。
短而圆就系缺乏头顶脑门，可以有富，但系无贵，头顶唔够饱满，求贵始络差，扁即系无后尾枕，无枕骨就蚀底，平晒的，四十岁后就好有问题，就要耳后有骨就可避免事业破败。
头若扁生早岁迍邅，头若偏生中年破败。
扁生即系最重要四个部份，唔够饱满，呢度话早岁彖煎，就一定系前额凹陷。偏生即系斜、歪、呢度话中年破败，即系左右颧骨有高低，要去到败就一定系高低或者大细面好明显。
头有两角必有官禄，头有四角其贵非常。
书上面多数话头，其实应该系额先至，两角即系日月角，日月角起并唔系真系有两隻角，而系日月角部位饱满，好似亚松，但系如果露骨就刑父母，头有四角即系日月角加辅角，亦即系包括埋官禄位同埋印堂，就一定有权力。
头大无角不是粗人便是木作。
头大，系讲过大，圆周应该系２４吋，女人就２２吋，过大过细都系唔好，粗人即系体力劳动，木作即系手艺，以前的观念除靠老婆卖首饰供佢读书就系最好之外，其他自己搵钱读书都系低级
有日月角骨无辅骨者，有辅骨无日月角骨者。
有日月角骨即天庭位饱满，但额部左右泻，形硕凸，如果中线饱满，则少年得志，但系以后点样就唔知，但多数都起落好大，有辅骨而无日月角骨即天庭位破，但仍然系有前途的。
无日月角骨与辅骨仅得额圆者，有日月角骨辅者。
额圆者多数系商人，因为额无辅角表示配偶父母对你无助力，无日月角父母无助力，最有可能就系白手兴家。有日月角而又有辅骨，出身家庭一定有番咁上下。
有边地骨无日月角骨辅骨者，边地骨日月角骨辅骨皆起者。
边地即额边有骨即额广，虽然唔饱满，但胜在人聪明，谂野快，有边地骨而又有日月角更加埋辅骨，即系话呢个人１８岁就开始行运，要气长久就一定要加上后枕骨够厚，如果淨系有前无后，只系一阵风光。
头方顶高居尊天子，额方顶起辅弼良臣。
头方要够长，包括前后左右骨要厚，加上顶门，即系天灵盖高，主事业长久，额方即系额如壁立，有分辨是非能力，亦够忠心。
头大硕阔王侯相，虎头燕颔封博望。
博望侯系张骞出使西域的封号，额开阔好似把扇就叫虎头，颏即系下巴，颐即系腮帮，下巴丰满同颐相连叫燕颔，有呢Ｄ形格想无福都难。
头长面长衣禄相当，头短面长觅食他乡。
头长即系厚，头厚面长即系成个头好饱满，一定出生于良好环境，头短即系薄，后尾枕骨薄就一定早出离家搵食。
顶平头圆额又方早岁姓名扬，脑后横生顶又平官禄倍增荣。
顶平唔平唔紧要，额方圆即系天庭饱满，得父荫，好后生就有名气，但系要长久保持就要脑后横生，即系后尾枕骨要厚，未见过无后尾枕骨的人到中晚年仍然富有的。
顶骨连鼻文拜相，脊骨连枕武封侯；头圆顶方还多福，头尖颈细忧贫。
有个名好好听的，叫做伏犀贯顶，呢个人就算未读过书，都可以出人头地。就好似老虎咁威猛，所以投身武职就一定升官快。思想快捷长远，一定样样好，头尖就一定无计划，颈细身体差，睇医生都睇晒Ｄ钱。
脑削额塌庸俗子，顶尖额窄不为官；头小额小多无禄，有头无颈二十亡。
脑削思虑唔够週密，额塌想Ｄ野好无谓，志大材疏，何止不为官，就算做平民都好辛苦。头尖额窄唔单止无禄，简直生活都有困难。有头无颈系话颈短，头大而颈短一定多病，二十死就未必。
脑塌额窄人急燥，顶尖额塌性轻浮；额窄头大夫妻必碍，额突脑溃早剋中败。
脑塌系后脑扁，加上额上多茸毛，就小小野都唔忍得。头顶高耸想野好快，额塌即系即系一路斜上去，呢人做野好唔稳阵。额上寒毛多就形成窄，后枕骨凸表示性欲旺盛，如果两个都系咁横就无问题，但系有一方面唔系的就有麻烦，额凸后枕凹，中年小心。
头偏额窄难言福寿，根低梁塌定主财空。
头形生得唔正，就好难会有一个好额，福就肯定无，寿就未必，因为有无寿亦睇颏宫，颐位先至可以决定。鼻为财星，塌即系鼻梁有节，中年有问题，根底即系山根低，４１岁后就当有一劫。
天庭骨隆起，眉随骨起，佐串骨角起，鼻骨芽起。
天庭骨包括日月角，辅角开阔，起即系饱满，官禄宫高就容易身居高位。呢个起唔系凸起，系有骨而隐伏，太凸呢人追求野未必用正当的手段。佐串骨即系左右塚墓，有小小拱就叫起，就算额形唔靓，到廿六七岁都有运行。芽起者，山根圆，准头圆，就算唔大贵，都会有好多贵人相助。山根窄小，气量浅，如山根欺眉骨，女主刑。
颧骨平平起，太阳穴线起，颈骨平阔起。
颧骨唔够高，表示成败都好快，或者有颧无面，即系颧高面珠凹，呢个人就寡情薄义。太阳穴亦即系理财位，呢个位饱满，主识得处理金钱，有办法将钱养大。颈骨连枕骨，形格威猛，向武职发展较大机会。
顶圆脑厚有为有守，顶圆脑塌中运必败。
头顶圆的多数有父荫，有所作为，脑厚有祖荫，脑厚即系髮转位置，如果两样都有一生都顺利，就算有所损失，都唔会全部，会好快复完。顶圆就有父荫，脑塌即系后枕平或凹，处事唔得慎重，中年后就最多波折。
脑圆而大祖德正隆，脑长而圆祖德绵绵。
有祖荫同有无祖德系两回事，呢度讲只系有又父荫，脑长而圆有丰厚的荫护，脑长即系后尾枕厚。
脑骨溃烂祖上失德，脑窄不圆贫苦中年。
脑骨溃烂即系后尾枕无头髮，后尾枕头髮特别少，祖上失唔失德就唔知，无祖荫就肯定的。脑窄即系侧脑唔发达，侧脑唔发达表示呢个人无保护性，又无斗争性，中年贫苦系应该的，因为中年系一个人最需要搏杀的时候，如后枕厚就都好
顶骨平伏起，枕骨强起，枕高而大远祖福泽，枕小而圆父祖馀荫。
平伏起亦即系唔低陷，唔露尖，有责任感，可以管钱。后尾枕骨连肉，有问题就有人帮，最主要系经济问题。髮转个位特高，主长辈助力，在社会上有年长的人特别喜欢你。摸落去唔觉尖，就表示后生的时候有父荫。
枕骨斜出谋生乏术，枕横骨藏福禄绵长。
斜出即系歪，头骨歪主奔波劳碌，未必唔可以生存，但系一定辛苦，最好就多头髮，如果小头髮就好难改变。后枕骨发达望之好似火星人，容易有横财，长唔长命就要睇埋其他部位。
枕陷而露败业灭绝，孤骨而露贫苦无助。
枕低陷就因为持续性唔够积极，所以遭受少少挫折就无心机。孤骨即系特别特尖凸，过凸就早离家，同时亦少助力。
枕陷且不时挨饿，枕陷成坑必有后殃。
陷破包括歪或无髮，平扁，缺乏一个安定的居住环境。枕陷成坑思想唔够慎密，容易冲动，唔单止后生系咁，老一样，所以话有后殃。
瘦人颈短三十前死，肥人颈长四九而亡。
人瘦颈短就钟意冒险，死就未必，但系多意外就一定的。人肥颈长未必短命，要睇颈的粗幼，长而粗无问题，长而幼就大问题。
瘦人颈长不富亦安康，肥人颈短早入翰林馆。
所谓长系由髮脚至颈椎骨，唔超过一隻手掌位，如果超过就系过长，瘦人颈太长就叫马颈，凡有马颈就一定身体唔好，所以颈唔好太长。肥人颈应该短，太短就容易有意外，颈短容易有心脏病，心律不正常。
颈圆而方福禄相当，颈细而长贫贱异常。
古书话方主贵气，颈方就一定头骨侧脑发达，有保护性同进取性，颈圆个人脾气好，多命长。不论肥瘦，颈幼、过长都好难有好的身体，更加唔会有好环境，搵埋唔够睇医生。
如罂如瓶总非吉兆，似鹅似豕恉主不祥。
罂系粗而短，瓶系细而长，又粗又短的叫猪颈，又细又长叫鹅颈，呢度话肥而短同瘦而长，两样都唔好的。
颈肉厚实不缺衣实，皮肉莹润财雄势盛。
厚实就系够粗，同时颈有肉，颈有肉系好难得的，唔露颈筋就系好，后面呢句未必咁，纯粹系古书上的夸大之词。
颈袅而斜性劣多贪，颈般不洁性鄙且拙。
颈袅而斜即系袅鸟的颈，左摇右摆，主性格贪婪，但系贪小利而乞人憎。颈般，即有班，或毛生上颈背，对争夺性多数都用唔正当的手段。
瘦人结喉迍邅孤老，肥人结喉刑剋祸殃。
颈幼凸喉核，个人唔够灵活，同时人缘亦未必咁好，喉核太过凸出未必一定有刑，但系自己身体就多数有问题，呼吸系统的多数。
面如满月富贵不歇，面起重城早发晚荣。
面圆突起叫满月，面长凸起叫重城，其实满月重城都系同一样，绝对唔系乜新鲜，原来就系对面不见耳，形成外大内小，不见耳就一定要耳贴骨，耳贴骨就一定包括埋耳厚，耳珠有肉。
面带三拳边塞之将，面有城廓衣食不错。
三拳即两边地，两颧骨，两腮骨都横起，呢人一定孔武有力，勇猛非凡，多数系武职，佰系奴果女相就太缺乏温柔之气，有刑之象，面有城廓即系下巴有条肉包住，好似邵逸夫，如果面长而无廓生咶都几奔波。
额方者贵，额阔更荣，额隆者吉，额圆者佳。
额方者出身环境好，额阔的人就面面俱圆，至于唔贵，荣唔荣就唔知，额隆即系饱满，即系官禄宫生得好，一定早行运，额圆就手腕灵活，呢度话方、阔、隆、圆，其实系额头的其本条件。
额阔而塌中年发达，额仰而平晚岁身荣。
塌即日月角唔够饱满，无又荫就好难少年得志，２５岁前都无乜好运，要过眉眼运先至有运行。额仰即系向后斜出，但系重要有下巴相配，如困下巴生得唔好，晚境都无得好，如果有耳珠朝海口，就更兼有权力。
额尖而窄早岁蹇带，额破且缺壮年波折。
一般来讲额尖窄主贱，俗语话：朝中无尖头宰相（以前的额都当头），家中无额窄贵妇。额头窄少年运就无乜好睇，额破且缺一定系好多挫折，同时亦无贵人，但系胜在捱得。
额低骨陷刑愚顽，硕横骨露凶恶刑亲，额塌少年虚花，额突幼岁孤刑。
额低骨陷即系眉骨上面凹陷成坑，系唔会接受别人的意见。额横骨露即系额骨向前凸出，呢个人一定好反叛，好难教。额塌即系中线低斜，想有一份长久的工都难。额突多数系讲前额上半部凸出，如果加上耳缺，表示父母离婚。
头大额大粗鲁愚眛。
头大额大系指有前无后，后脑尖细的人智慧一定低，有前无后的人一定系志大才疏，如果加上唇薄，讲就无敌，做就无力，如果加上眨眼，就更加讲无句真。
额尖耳反三嫁未了，额阔颐朝必是英豪。
额尖即系额窄，汗毛多，呢人野蛮，耳反就一定薄，耳厚就好少反的，主个人钟意揽权，要妻夺夫权，一次婚姻就真系好难到老。额头广阔，下颏朝天，英豪就未必有晚福就肯定，古书话晚年出仕。
额阔颐尖迍邅晚年，额窄颐圆困顿初年。
呢度系少年运好，下巴尖晚年就要小心，后生就一定要学专业技能。额窄早年梗系唔好啦，颐位圆就多数得到仔女的助力。
耳厚而大永无颠沛，耳硬上提早岁扬鞭。
耳厚表示祖荫好，大表示身体好，厚而大就一生都无乜波折。耳硬意志强，耳提高出出名早，如果耳提高而系火形耳的就同母无乜缘份，但系自立性强。
耳薄而软弄巧反拙，无廓有轮处事无能。
耳仔薄的人钟意投机，耳仔软的人钟意取巧，如果又软又薄，即系钟意投机取巧，究竟得唔得就要睇佢当时的流年运。无廓即系好似一隻水，做唔够稳阵，同时亦都无魄力去兼顾咁多，处事无能就未必，最主要系睇乜事，大件事，最好就唔好搵佢。
两耳招风破祖离家，两耳贴脑富贵到老。
兜风耳，如果屋企有钱的就系二世祖，如果屋企无钱的就早离家搵食，祖上得剩番俾佢，系佢地唔，点赖得呢个人呢。两耳贴，即系对面不见耳，后生的成就会大，因为缺乏个斗争性，究竟可唔可以富贵到老就言之过早，因为耳仔系主幼年，同埋一个人的性格。
上夬刑重，下尖创业难。
耳头尖就系火形耳，一定要配粗而硬的头髮，如果头髮幼而软，就身体有问题，所谓刑就一定系自己身体唔好。下尖即系无耳珠，无耳珠的就助力少，朋友帮都少，父母就更加唔使指意，最主要就系无一种的持久的冲颈，可以帮人发达，因为容易气馁，缺少屡败屡战的精神。
若得垂珠应，早晚定安閒。
有耳珠绝对唔会系安閒的相格，如果垂珠起折，就会好细个就有家庭的变故，唔系老豆就系老母，到晚年耳珠就一定好过无耳珠。
耳沟开阔幼岁顽劣，耳沟细小人人宠爱，耳沟骨反懂事较早。
耳沟开阔量度大，因为生好动，好动的人多数大量，好容易就会唔记得人错处，顽劣就因为精神充沛。耳沟幼个人就倚赖性强，性格又爹，但系就懒，做魄力唔够。骨反即系耳沟短，甚至乎无耳沟，呢人早熟，系思想早熟，太早懂事就一定捱苦多过歎世界。
面大鼻小多为人奴。
鼻细的人主意无乜，坚持力唔够，独立性唔够强，如果加上食指短，就更加有好重的倚赖性，所以多数受人驱使，但系鼻细的人多数忠心，最紧要配一双靓的眉。
面肥鼻瘦钱财难聚。
鼻瘦即系露骨无肉，亦即系土星无势。鼻为财星，原因系中国自古以来都系以土为财，有句名言：有土斯有财。土星薄就想剩钱都难，尤其是年上寿上灵骨，一定储埋一笔就会俾亲戚累你唔见
面横鼻塌生性凶悍。
面横即系颧骨横露，多数都横蛮无理，鼻塌即系鼻扁，如果鼻高就算野蛮都系择善固执，如果面横鼻又塌，就唔只野蛮，仲系好自私，最明显缺点就系护短，不分是非，亦都无分辨是的能力，但系做大恶事就无胆，只系自己的生活圈里面虾虾霸霸。
鼻圆耸印功名鼎鼎，鼻连眉骨父祖福荫兄弟友爱。
山根高，直插印堂，就容易得到有力人带「歇」，一定要鼻头够圆，如果鼻头尖就人缘无咁好。好似做大戏化粧，眉骨隐约由个鼻梁向外伸展，印堂饱满就一定出身良好，周围一定有一班帮得手人，未必一定系兄弟，同学朋友都得
鼻连边地终成大器，鼻短梁平自创前程。
呢度连并唔系真系由２３，２４个位置直耸而下，而系感觉到有气直冲而下，亦即系来龙丰厚，一定事业有成。鼻短一定要人矮，人高鼻短，想有前程就难，梁平就一定系要鼻梁，鼻梁窄就好难有创业魄力。
准丰梁耸家道兴隆。
鼻头有肉，鼻梁又够高，有白手兴家的能力，但系要颧骨相配，如果有鼻无颧，就４４岁后就好容易失败，要在４４之前搵够就根本无可能，如果可以搵得够就一定唔符合相格，一定有其他部位生得好的。
鼻隆而昂仕宦荣昌，鼻直而厚子贵封侯。
在古时，呢种相格只有做官先至有出路，但系现在唔同晒，有好多权力比官更加大，例如做议员。鼻直而厚又点关仔事呢，简直乱嗡，唯一可解就系鼻厚就人中都唔会太浅，仔女身体都会好
鼻如缩囊到老吉昌，鼻如狮子聪明达士。
即系鼻短而大，好似个蒜头咁样，呢人好有量度，同后生好容易相处，到都好开心。鼻翼阔而厚，鼻孔又齐，又圆，聪明同时生性乐观，狮子鼻多数鼻梁够长而厚，鼻梁薄就唔够乐观。
鼻如截筒财禄亨通，鼻如悬胆白手兴家。
鼻孔齐而平，就适合做正常收入工，就好少有失业，但系突然间的横财就少之又少。所谓猪胆鼻，呢种鼻系女人度就好，如果男人有猪胆鼻就气量浅，同时变能力不足，女人有就旺夫，鼻为夫星，女人小气都唔紧要。
鼻柱广长必多伎俩，鼻有损破孤独饥饿。
鼻梁广即系阔，阔而长一定魄力好，有足够的精神体力去学好多野，最紧要就系呢种形格的鼻有上进心，如果鼻梁窄而皮薄，你迫佢去学都好难。破损即系土星受损伤，即系财星受伤，就梗系穷啦，人穷就想唔孤独都难。
准头尖小人多贱，孔仰家无隔宿粮。
准头尖就主个人有原则，样样都依照规距做，无乜人情味可言，呢度尖小系话薄而见骨，凡鼻尖见骨的人多数忘恩寡恩。朝天鼻使钱无节制，尤其是流年部位有破损，就一定无端端耗费大量积畜，如果行正鼻运就要睇鼻翼厚定薄，先至决定当时的运气点。
年寿高明无灾有庆，双座光泽夫唱妇随。
年寿高明无灾就未必，就要睇皮薄抑或厚，高明即系罗马鼻，表示有进取性，庆即系好事，有进取心梗系好啦。双座即系夫妻座，夫妻座范围由４２，４３至到年上寿上呢个位，如果无乌黑无灰暗，一定夫妻和谐。
金匮依禁房钱财满库，子宫傍夫座福禄骈臻。
金匮即系鼻翼，依禁房即系鼻翼同面部无起坑，接口、界线好平滑，就好多积畜。子宫即系眼肚，子女宫，傍即系傍住，夫座即系勾陈位，子女宫生得靓而又见到勾陈位饱满，就有夫福享，呢度系讲女人的。
甲匮连准起多财多宝，颧骨入天仓有权有势。
甲匮即系鼻翼，同上句金而成金甲位，连准即系鼻翼位同鼻头之间无一条凹线。入天仓即系颧插天仓，有权就多数，有势就未必。
鼻隆颧拱自助人助，颧高鼻塌多成多败。
首先一定要自助，颧拱表示有奋斗心，鼻头圆就有人缘，所以自助之后就有人助。鼻塌未必一定鼻形有问题，有厚颧埋鼻的形格，呢个人无乜主意，成功的机会就少，多败亦未必。
颧高颐削作事难明晚岁伶仃，独颧无面中年破败子散妻离。
颧高颐削即系牙较骨薄，贪婪，太过现实，有利就六亲不认，晚年孤独系正常。颧骨过高，面削，呢度系颧高压目而面又薄削，再加鼻梁尖削。
颧露颧尖破财中年，颧面低窊孤独无家。
颧骨露，皮薄，破财就未必，但系一定招惹好多是非，最主要系口舌是非。颧面低羽，即系颧骨位置生得高，成为颧压目，而面珠凹陷，性格孤独人缘差，到老想唔孤独都难，无家就未必。
颏方且圆晚年福禄，颏尖而矫有子不孝。
由字面晚年安稳，要有福禄一定要饱满，地阁方未必够圆，圆又未必系方，淨系圆即系有肉无骨，所以有人系唔可以瘦，瘦亲就环境转坏。下巴尖福薄，矫即系尖而向出，凡尖一定肉薄，唔可以有仔女在身边，仔女对自己好唔好就要睇子女宫，如果子女宫结实，仔女多数会留自己身边。
颏短且缩晚岁凄凉终不禄，颏尖而长一生贫苦又无良。
下巴短人就多数性急，缩即系「巢」皮，凡亲巢皮一定缺乏实行能力，亦都缺乏坚忍能力，咁相想晚境好都难。下巴尖而长性格多轻挑，尖就一定无肉，即系无积畜，一生贫苦又未必，无良唔系，有无良心绝对唔系下巴尖唔尖而定的，系有无鼻油而缺定，或者好似勾践。
头圆足方真富贵。
呢个圆唔单止额头圆，重要头盖骨圆先至合格，叫做真圆。头圆取象为天，足方取象为地，足方唔系隻脚四方，而系脚板底厚。头又够圆，脚板底又有肉，天地俱备，就天生好命，富唔富贵就要睇埋其他部位。
头尖足薄定贫穷。
头尖即系额头尖，额头尖即系额窄，额窄就少年运差，但系如果加上天灵盖尖就唔同，天灵盖尖就算额窄都可以逢凶化吉。足薄即系脚板底无肉，脚板底无肉就一定系肠胃多病，脚瘦同薄唔同，脚瘦即系脚面瘦，脚面廋就一定系际遇唔好。
头大口小贫苦早了。
头大就要眼大口大，如果头大口细就交际手腕唔够灵活，所谓口大食四方，食四方者即系人缘好，男人出外搵食一系就鼻头有肉，一系就口大，如果两样都缺乏，就打工好过做生意。
颧高仓陷有颧无权。
仓即系天仓，颧高唔单止要有面，重要天仓饱满，如果淨系得颧高，又无面又无颧，就不过系假权，屋企可以大声夹无准，但系出到街就无声出。
颏骨连颐晚福可期。
颏骨连颐即系下巴方圆，下巴方圆有肉梗系有晚福啦。
颏尖颐削到老苦作。呢度同上句就
相反，两边腮骨削，下巴尖想有福都难，唔使等到老。有呢相一定要有专业技能，否则真系到老苦作，作即系技艺。
颏骨连腮呼唤成堆。
颏骨连腮下巴连腮骨，但系又未至于耳后见腮，表示子女成群，唔系伙记多。
长如茅立破祖离家，短如豕蹲顽劣多凶。
身大瘦、高、茅立即系企得直，呢度讲无萝柚，一定早离家搵食。豕蹲即系猪，肥而行动迟缓，就一定性格顽劣，亦都唔会太长命。
体大骨秀名满宇内，体小骨秀不富便贵。
秀即系唔露节，身体高大而有肉包住，会有名气，身瘦而膊头有肉，多数都系有钱人，而且可以长久。
胸阔而平豪迈绝伦，胸平而窄难当重任。
胸阔而平首先要膊头够横，呢人有义气，膊头横就可以承担重要责任。胸平而窄就一定系膊头唔够横阔，所以唔可以担当重任。
胸阔厚实富而好施，胸宽露骨破败落寞。
胸阔几时都系好，厚实其实系背脊，背脊厚就一定有福，好施就系心地好。胸阔露骨，有胸无背，背脊露骨就福薄，都好难有真正朋友。
上露下陷孤苦到老，上下皆陷奸贪枉法。
上露下陷就系鸡胸狗肚，鸡胸向外凸，狗肚向里面缩，呢格第一身体差，第二就缺乏坚忍力，第三无容人之量。即系上下成坑，瘦而露锁骨，肋骨露坑，枉法就未必，贪小便宜，惊蚀底就真
胸阔而促生性狠毒，胸凸而挺生性愚蠢。
促即系短，即系腰短，腰短的人多数勤力，富于进取，如果腰短而背薄，富于争取性但属于不择手段类。淨系鸡胸，缺乏争取性，愚蠢就未必。
妇人胸宽贤淑端庄，男人心陷作事见小。
不论男女都以胸阔为好，所谓胸衿广阔系真，胸窄气量一定浅，但系胸阔背脊一定要有肉，如果背脊无肉，样样睇唔开，胸骨窄，个人小器做唔似男人
胸长不直有才无德，胸短不平为富不仁。
即系寒背，寒背就算有才干都无魄力，呢个德系解能力。胸短即系腰短，腰短就一定有进取性，短而凸露，为富不仁就未必，手段可能差
背若屏风福子孙，背若负龟必有施为。
背若屏风即系阔，阔就系顾家。负龟即系厚，背脊厚就梗系有福啦。
背如负物边陲将帅，背如团扇现成基业。
背如负物即系步履稳重，俾人有一种安全感，可以重责，并不限于边陲帅。背如团扇即系膊阔腰窄，有父荫，守唔守得住就要睇其他部位，例如有无罗柚。
背部偏斜绝嗣贫夭，背部薄窄不贫则折。
偏斜即系脊骨歪，脊骨有问题就想生仔梗系贫夭就未必。薄窄就一定肺弱，贫就未必，容易有肺，以前有呢病就实死梗。
两肩平阔衣食不缺，肩窄下垂毫无作为。
膊头平阔就一定有魄力，自食其力，唔钟意靠屋企。肩下垂唔紧要，最忌鸳鸯，左右唔平衡，如果唔平衡就行路左摇右摆，达唔到行如风，立如松要求，得唔到人地信任。
两肩上耸所发不久，肩耸肩寒老无一椽。
两肩上耸，叫做膊头高过耳，唔可以将自己的成果长久保持，就算系火形人都唔可以长期保持长久。寒即系露骨，凡膊头露骨多数都老来无得倚靠。
右肩低左肩高白手兴家，左肩低右肩高别祖离家。
呢度属于尽信书不如无书，相里面凡有高低都系唔好，点会话白手兴家，简直搅笑。
臀圆骨开诸事亨通，女人臀大反为下贱。
臀圆即系萝柚有肉，无论男女都要有肉先至好，无肉就系空心老官，女的夫妻运都唔好。骨开即系盘骨阔，就唔会压迫腰部，肾机能好，尤其是女人生养容易。臀大一定系反常的大，唔单止萝柚，任何反常都系唔好。
小儿无臀灾厄频仍，纵然乖巧能言而亡。
细路仔无萝柚就系身体差，亦表示老豆唔肋，但系如果鼻头够圆就会好，如果鼻薄就认真差。
少年无臀百事无成，田园不守破祖离宗。
无萝柚无论乜年纪都系差，少年就续书好难有成就，同时亦好难有祖业，有都守唔住。
中年无臀破祖飘零，刑妻子奔走红尘。
如果少年有萝柚，而到中年反而无萝柚话，身体一定有问题，如果到中年都重未有萝柚话，就算有祖业都守唔住，成日不停奔走，居住的地方亦唔安定，老婆仔女跟住佢想唔刑都唔得，性格又唔合群，人缘好极有限。
老年无臀刷锅洗盆，无依无靠孤独终身。
如果中年无萝柚，晚年亦一定唔会有，都唔慌有积畜，什工都要做，洗锅刷盆呢工唔慌会高级，萝柚无肉晚年就一定孤独，独身就未必，最主要系无积畜，如果加上无脚瓜「朗」，就真系独身居多。
肥人无臀多学小成，半生无运四九归冥。
肥人无萝柚，即系空心佬倌，点样勤力都唔会有成就，唔系多学小成，系根本唔肯学野，但系可以后天补救。四九归冥系话３６岁有大劫，呢系讲好肥种。
瘦人无臀四处奔波，纵有小就终无一成。
瘦人无萝柚就一生劳碌，想优悠生活就好难，但系如果瘦人有曲线就多数好命，亦都可以有积畜。纵有小就系讲中年的瘦人后天就容易，但系过中年就好难再有机会。
身长无臀木屐无钉，身矮无臀孑然一身，若还尖矫不免轻佻。
身长系腰长，腰长萝细容易跌倒失败，腰长都一定懒，腰长加上无萝就容易气馁，有小小挫折就容易自暴自弃。腰短人就勤力，腰短而无萝人性格自私，人缘差，呢度话孑然一身并唔系话无老婆或者无老公咁解，只不过系朋友少。若还尖矫，唔系萝柚凸起，较为难以观察，呢个萝柚尖系要低先至见到，一般行路或者坐低系见唔到，有呢种形格的大事就一定退缩，表面系睇唔到。
面长身短中年发迹，面短身长衣食奔忙。
面长中停长，中停代表中年，４０至５５岁，身短腰短，腰短勤力，肯搏，就算无其他特别好相好部位，到中年都一定有好环境。身长懒，面短反覆，两样夹埋就属于见异思迁，唔守本份，多数都一事无成。
面瘦掌方孤苦凄凉，面短掌圆衣食自然。
面瘦属木形，掌方属金形，思想同行动唔协调，木形属思想形，金形属行动形，面瘦掌方形成思虑过多，谂多过做，好难有成功机会。凡面短人好动，掌圆属水面短带圆属水，有动意欲，兼且人缘好，又肯勤力，所以衣食好，同时面方圆人食禄仓好少薄的。
身长脚短富贵可断，身短脚长贫无住场。
身长脚短有个花名，叫做矮脚鸡，性格善于争取，识得把握机会，富贵就未必，但系生活无忧就肯定。身短即系腰短，本来系勤力的，但系如果脚特别长，呢个脚长系指小腿特长，小腿特长即系无脚瓜「朗」，凡无脚瓜朗无论做或居处，都好难安定。
两手白润富贵前定，两手粗黑谋生乏术。
两手白润即系皮肤幼细，毛孔细，手背皮厚，表示出身环境好，可唔可以一生富贵就要睇埋其他部位。手背根露想唔克都唔得，呢度话谋生乏术唔，手背露根多数有一技之长，但系毛孔粗就算有技术都系好辛苦技能，例如打石技能或者搬运能，如果毛孔细就可能系修理钟表技工。
手软如绵衣食两全，手如乾薑家道必昌。
手软如绵就一定要多肉，如果手软而薄就一定从事唔正当的职业，女人手薄就福薄，呢个福系指夫缘。手如乾薑系女人专有，另人极之少，乾薑即系手皮粗硬，呢女人钟意做家务，同时一定有洁僻，握手的时候感觉好似柴皮咁样，就系呢种人。
臂如捆布不贵便富，臂中肉拱苦作有种。
捆布即系圆，手臂有圆有扁两种，手臂圆表示发育良好，身体好，同富贵有乜关系臂系指上臂，上臂连膊头，膊头厚就一定福缘厚，膊头薄就表示搵到都剩唔到，剩得到都好辛苦。臂有拱肉即系手瓜起，以前多数系苦力先至有，但系现在就视之为健美，因为现在职业已经再无贵贱之分，有种即系天生，以前人重文轻武，都唔用脑稔，无体力努动的人又点会有屋住呢。
臂圆而长衣食相当，臂细下尖衣食难言。
臂圆即系上臂丰满，见肉唔见骨，有咁臂骨一定膊头有肉，又背脊有肉，衣食自然好。臂细下尖即系手较骨大，一定系身体唔好，手瓜幼一定肺量细，呢度同贫富无关，亦都同出生环境无关。
肘短而圆衣食自然，肘长而扁贫穷难免。
肘系前臂，前臂短系自然之相，正常相系身长过臂，臂长过肘，肘长过掌，掌长过指，如果其中有一样唔对称，呢个人一定辛苦，最常见就系手指长过手掌，多数辛劳搵食，呢度话肘长而扁就系长过臂，一定辛劳搵食，贫穷就未必。
肘短而直不愁衣食，肘长瘦尖贫苦颠连
呢度肘短而直系以前读书人特质，表示唔使劳力搵食，以前的人唔崇尚运动，对手瓜起视为贱役，根本唔知道系身体健康的象徵，所以后来俾人讥笑为东亚病夫。肘长过臂，加上尖瘦，手掌较骨大，一定手背露筋，手背薄就一定出身环境差，但系唔代表一世穷。
腕秀而方珠玉满箱，腕正而圆衣食眼前。
秀系唔露骨，方而有肉够软系好少，多数都系手软而长形，方形好少。如果手方形但系又硬多，所以方而软系好少，手掌长而软人无自制力，手掌方而软人有决断力，有掌权能力。腕正而圆系近手颈线，呢度肉厚就一定有父荫，所以话衣食眼前，但系身形肥胖就唔会有父荫，好似肥肥个女，一出世就无父荫。
腕粗骨露一生苦作，腕边起坟告贷无门。
腕粗骨露一定配王字面，性格一定顽固，重有一样缺点就系顾多唔顾内，唔系劳苦大众都系餐搵餐食之人。腕边起坟一定配鼻梁薄而起节，俾人一种信唔过感觉，有困难时候好难有人帮你。
掌背厚如龟福禄皆可推，掌心窝如碗仓丰库亦满。
掌背厚唔见筋，已经系有福之人，根本唔便厚如龟。掌心如窝有钱剩，剩得辛苦抑或舒服就要睇手背厚定薄。
掌厚骨软幸福不浅，掌粗骨硬横蛮任性。
呢度系讲女人，掌要厚，就男女都的，但系骨软男人就无咁好，手骨太软就主倚赖性强，女人就无所谓，男人就梗系唔得啦，女人有呢掌就样样都唔使操劳，有福之人。掌粗系讲手皮粗，女人手皮粗表示呢个人有主意，以前人唔钟意女人有主意的，所以话横蛮，骨硬有行动性无倚赖性，唔使等人地同意而自己去做，所以横蛮加任性。
手掌常温无求于人，手掌常冷时多困境。
手掌常保持温暖，第一身体正常，第二心境平常，唔会太过紧张，亦唔会急燥，做程序安排得好有条理。手掌冷热无常，表示呢个人情绪好唔稳定，运程起落不定，好一阵，跟住又行衰运。
掌软如绵快乐一生，粗硬露筋苦作辛勤。
呢度软如绵系包括埋手指骨节，手指背节纹不露，表示做少波折，手指背越多皱纹，就越系要亲力亲为。有纹都唔止仲露埋筋，想做唔辛苦都好难，仲要好勤力先至够生活。
十指端正一生顺境，十指尖长家有储粮。
十指端正，正确系手指够直，手指直无论系自己做或系合作都好顺利，如果加上唔露骨节，就更加优胜。十指尖长一定要好似笋形，手指如竹笋，就一定出于富贵之家，就算唔系出生于有钱之家都好容易教。
指柔而密财恒自给，歪枯连皮孤独无依。
手指罅疏就使钱无节制，密就自制能力。手指与手指之间皮生得高，同时亦都皱皮，性格极度孤独，老而无依唔出奇。
指秃短生性愚鲁，指硬而疏衣食难周。
手指长就聪明，手指短就缺乏好奇心，如果短而掘，判断力唔够而又唔肯接受人地意见，愚鲁就要睇埋额头够唔够高。指硬而疏就一定系际遇唔好，俗语话鸡爪形，生活一定困难。手指抑即手指向后弯，古书上面称为「反元」，主六亲无靠就一定系大姆指向后弯得好利害，但亦都主容易得横财。食指后弯主好虚荣，为人唔实际。中指后弯贪玩而不务正业，成日转工，但系手指够长就可以减少缺点，最忌向后弯而短。如果淨系左手系咁，到中年就会改变，如果左右手都系咁，就到老性格都唔会改善。指尖扁唔适宜早当家，更加唔适宜早婚，因为２５岁前运气都唔好，同时亦唔识理财。手指短，手指唔适宜太短，尤其系尾指，尾指短除代表疑心大之外，如果短过姆指重更加表示呢个人系奸，而且属于奸诈多计。手指硬多劳碌，会同亲人有隔膜，年纪越大，同亲人隔膜亦都越大。手指头掘就做唔到精细的工艺。手指歪斜－食指歪自信心强，能吃苦，中指歪表示容易睇人唔起，生性傲慢，无名指歪任性而为。做唔顾后果，尾指歪主仔女唔声话。大姆指歪系最唔好，表示做唔够魄力，遇困难容易退缩，属于无事牙擦擦，有事刮刮。指逢疏除对金钱观念弱之外，亦主六亲无助。上端疏主唔聚财，指根疏主无情，指有节多数工作辛劳。
手长过膝兴创事业。
属于奇相，凡亲奇相就一定要在乱世先至有机会，太平盛世就唔会有出头机会，睇历史就可以証明。
手短脚长性行不良。
手短脚长无论肥定瘦都有两个缺点，一就系无脚瓜，二就系无萝柚，无呢两样，个人想好都难，其实唔关手短事。
胸宽背厚光前裕后。
胸宽主才智，千祈唔好窄，所谓心胸广阔，背厚重紧要，背脊厚就福泽厚，土形人多数有呢形格，属于平凡人一个，但系如果木形人有呢种形格就一定有好成就，一定超过前人，亦都有能力福荫后人。
胸凸背凹劳苦早卒。
胸凸即系鸡胸，背凹即系脊骨成坑，两样加埋就系腩部有问题，劳苦就未必，但系短命就好难避免。
前仰后俯邦国之辅。
在前面望个胸好挺，在后面望背脊好厚，成前仰后合之格，呢人做有冲劲，性格又稳健，如果一个机构有呢人一定发展得快而又作风诚实，好似中个领导人有个都系咁。
背宽胸厚富贵长久。
背宽做就有当，胸厚就心地好，背脊厚为中忠诚，加上心地好，一定好早行运，做脚踏实地，唔会冒险，所以生活就算唔系大富亦都平稳。
有背无胸晚年孤贫。
有背即系背脊无坑，唔会系厚，无胸即系陷，胸陷就器量浅，至于晚年孤贫，就要睇埋地阁位好唔好先至决定。
鸡胸鸭背多非善类。
鸡胸即系凸而露骨，鸭背即系薄，背薄做事就唔够踏实，胸凸就唔同丰厚，厚就心地好，凸而露骨就相反，样样都唔顺超，所以话多非善类。
狗肚鸡胸狠毒深沉。
狗肚即系窄小而凹，又叫蜂腰，腰窄一定要配阔肩，如果肩又窄，心性唔平衡，无容人之量。
弓背蜂腰过路拆桥。
弓背即系「头佬」，蜂腰即系无肚腩，头而腰细，专系度桥，就算损人而不利己都觉得好过稳，但系头而有肚腩一样系算死早，但系就一定要对自己有利先至肯做，凡头人都无所谓义气，只有利字当头，所以对呢种人只能够动之以利，切勿以为感情交情对呢种人有用。
鳖背龟胸好色贫穷。
龟背系有福的象徵，但系龟胸就唔好，平而露骨，呢样唔可以判断为好色。鳖背亦即系平而扁，有呢咁样的形格想唔穷都难，至于好色与否就未必。
肩寒背削资财耗尽。
寒即系薄，膊头见骨就无论搵几多都系多馀，因为一定有无无谓谓令佢使晒钱，好似梅艳芳，凡膊头见骨好难背脊有肉，想有积聚都难。
肩阔臀宽到老无波。
膊头阔就有当，肯承责任，臀阔就有后福，一生都无负于人，亦即代表人缘好，到老无潻系正常。
腿长圆肥衣食俱全，短圆粗贫贱多忧。
腿系大脾，脚同手系一样，都要一截长一截短，大脾长过小腿系先决条件，圆而肥亦都系最基本，因为大脾肥就萝柚多数有肉，衣食就一定唔差。同样系够圆有肉但系大脾短过小腿就问题大，贫贱就唔，但系多忧就一定，因为小腿长过大脾就一定做不分轻重，如果加上额头低就一定是非不分。
腿大长圆智大福厚，短若细瘦劳碌奔走。
腿大加长又圆福厚就可信，智大就未必，大脾够长就表示性格温良，所谓贤。短己经唔好，重要瘦，做就唔慌肋，唔使讲就一定劳碌奔走。有一个好难听的名，叫狗腿，狗腿就一定系大脾瘦而短，人脚搅到狗脚梗系唔慌好啦。
膝圆而大无灾无害，膝露而尖官讼连年。
膝圆即系有肉，膝头有肉就一定有大脾有肉，大脾有肉就萝柚有肉，就一世够运。膝头哥露骨就一世都唔够运，身体亦差，正式系膝头大过脾，想好都难。
膝圆方藏富贵异常，膝骨尖露必遭牢狱。
呢句同上一句大同小异，藏即系肉厚，富贵异常就真系夸大。膝尖露骨就容易招惹是非，有无牢狱之灾就要睇其他部位，例如生命线有无方格。
胫前骨生稜角，胫中骨如刀背，命运不由人常遭小人妒。
胫即系小腿，胫前骨即系膝头对落，将个膝头屈埋就见到。正常应该系圆或者平，如果有凸出就唔合格，自主性唔够强。胫中即系上下五寸，原则上任何一条骨都要圆而好似竹咁先至合格，但系小腿骨就有分别，小腿骨就有系扁形，摸落去就好似刀背脊咁样，呢个人就会好辛苦，一样会招惹好多是非。
小腿圆直丰衣足食，小腿不圆衣食难全。
上面话胫骨扁就劳碌，呢度话胫骨圆就有好环境，因为骨圆多数有肉，如果皮包骨就想好都难。
胫向前矫好吃懒做，胫向内弯大言不惭。
呢度胫向前即系脚向外弯，同向内弯系一样，小腿唔够直就一定性格上有缺点，唔系懒散就系钟意夸大，呢两句分开精细，因为向内弯人多，呢个世界作大人多。
胫如竹杖贫贱不良，胫如瓠瓜生性愚蠢。
胫如竹杖就系无脚瓜朗，好似支竹咁样，想搵到食都好难，不良就未必，以前人写书通常都将贫同贱拉埋一齐，其实贫同贱系绝对唔同的。胫如瓠瓜，最贴切就系水瓜，两头细中间大，呢脚形就一定配一双鸭脚，呢人智力就低，如果加上眉压目就更加肯定唔会有高职位，有呢脚形多数都系由面，后生时一定辛苦。
脚背厚方富甲一，脚下容龟富贵可推。
脚背同手背一样，最好就唔露筋，手背主先天性，即系出生环境，年幼时家境，脚背主后天际遇。脚背有肉「肥都都」就多贵人，如果手掌有贵人线出现表示佢现在所谋事一定好顺利。脚下容龟即系脚掌个窝好大，脚窝大表示有父荫，呢个位好唔好就一定要会行先至睇得准，ＢＢ仔太细系睇唔准的，所谓富贵可推即系老豆剩番好多俾佢。
脚背有肉现成福禄，脚心有肉堆金积玉。
脚背有肉就际遇好，贵人又多，脚背会跟年岁而改变，可厚亦可薄。脚心即系脚掌位置，脚掌有肉就弹力好，行路姿势唔会摇摆。俾人一种好稳定的感觉，如果加上背脊厚就想穷都难。
脚背无肉不賸一钱，脚背平薄贫穷之辈。
脚背见晒脚指骨，好似鸡爪咁样，想剩钱都难，最主要系晚年无积蓄。脚背平薄即系皮薄，露筋就好难身居高位，亦都搵唔到钱，唔好讲有无得剩，搵到至讲。
脚小背厚不富则贵，脚大且横不免贫穷。
如果系土形或金形人就唔可以脚小，因为土形人身形多数厚实，金形人多数骨架粗，所以呢两形人脚小就唔对称，亦都唔会富贵，其他水、木、火形就可以容许脚细，都有富贵机会。脚大且横即系脚板阔，脚以长形为贵，如果向横发展，呢个人属于四肢发达，头脑简单之辈，想唔穷都难，一定从事体力劳动职业，亦都多数系王字面形人，有一个好处就系身体够强壮。
五趾纤长必定贤良，五趾端正豪万成性。
脚趾长有一个特点，就系容易谅他人的过失，如果长而有肉就原谅佢，而佢会记得你，如果长而露骨，就算你对人点好都无用，例如借钱出去通常都无得还。五趾端正即系唔丫开，隻隻拍得好埋，表示呢个人好通情达理，如果加上鼻头有肉，呢个一定系善长人翁。
中趾长圆绝处逢生，趾短而秃一生苦作。
呢度中趾即系二趾，通常话二趾长过公，唔死一世穷，其实唔，二趾长人一定捱得，至于穷唔穷就要睇佢脚有无露筋，如果脚背见筋，捱得，但系搵唔到钱。呢度话长圆可以绝处逢生，唔使讲梗系有肉。脚趾短无问题，最忌就系秃，秃即系掘，本来脚趾就唔会尖，但系呢度掘系头大尾细，变成掘都唔止，重要脚趾罅疏，，就最差，一世都辛劳，呢个辛劳唔系一定体力的。
大趾短圆父母俱全，大趾长尖自身颠连。
我睇人有无福就一定先睇脚趾公，如果脚趾公好肥好厚，唔使讲，呢个人一定好福气，如果系男人就一定和蔼心地好，做著佢伙记一定好好福利，如果系女人，唔使睇都知道有一个靓鼻，即系一定旺夫，但系有个靓鼻未必会有一隻靓脚趾公，呢就只系自己做肋，唔一定会旺夫。脚趾公长短唔紧要，最差就系尖或者扁，脚趾公尖就辛苦，好难有一份「印印脚」工，脚趾公扁即系薄，就际遇唔好，如果扁而脚指甲生前，就更加一世无运行，正式轮到你都唔到你。
粗短起节性情顽劣，曲折歪斜无恶不作。
粗短起节就唔限于脚趾公，其他脚趾都系咁睇，凡亲起节露罅细路都系难教，至于曲折歪斜无恶不作就未必，但系贪心就真，既然贪心就一定自尊心都差
胫黑且瘦衣食奔走，胫白而圆风光眼前。
小腿黑白就一定要睇全身皮肤，如果小腿特别黑，即系当时的脚头唔好，好容易俾同事讥为「陀衰家」，瘦即系小腿无肚，无脚瓜朗，就搵到食都搵唔到著，梗系奔走狼忙。无脚瓜朗而见肉色白润，其实亦唔系好现象，只系代表当时小小好环境，一阵好过之后又回复番唔够食，餐餐清的局面。
细如鹤脚不贫则贱，粗如瓠瓜先苦后甜。
细即系幼，唔单止无脚肚，重好似一支竹咁样，又直又幼，身体又唔好，际遇又唔好，贫就肯定，贱就未必。粗如胡瓜有呢脚形就多数都有一副由字面，初年就运气差，但系晚年就有福享，呢种脚形女人多，另人就较为少
腿大膝圆如斗一生不到公庭。
大脾有肉，膝头又圆表示一生做稳阵，个人修养好，处处容忍，所以惹官非机会少好多，呢度话斗咁大，只不过系形容词。
腿瘦胫细如杖为人下贱不良。
大脾瘦又无脚瓜，得个膝头，正式系膝头大过脾，下贱不良就言过其实，身体唔好就一定。
腿瘦膝尖常招官讼。
大脾瘦就福薄，上身肥而下身瘦想有福都难，膝头尖就系波萝盖细，膝盖骨细就呈尖形，唔系真尖，无人个膝头会尖，有呢形人成日都无端端招惹是非。
腿膝皆小贫穷难了。
腿膝皆小系指比例唔正常，如果人矮就要短，人高就一定要长，如果人高脚短，即系腰长脚短，呢个人的奋斗心一定唔够强，一遇挫折就容易气馁，缺乏一种屡败屡战精神，所以话贫穷难了，即系好难斩断穷根。
辅角插边庭名扬四海，内府连高广身跻朝班。
辅角即系２１、２２部位，插边庭即系同２３、２４部位相连，并唔系伶伶仃仃一旧骨起，而系有一度气隐约相连，呢度辅角连边地，后生容易出名，如果读紧书都会做到学生会会长。高广的位置系中正侧边，内府系火星侧边，呢位相连就主有高职位，呢部位系好细微的。
边地四起五十亨通，辅骨隆高三九居官。
前面话辅角插边，即系相连，呢度淨系两边地，两辅骨各自有起伏之势，困为并无相连，所以势唔够大，形成额有凹凸，所以行运就迟，五十亨通其实就话根本无运行，要睇额运一定系年青人，话五十行运简直就系扰笑，好过话你无运行。辅骨高隆即眉中间对上位置，同辅角唔同辅骨高一定连带左右丘陵饱满，所以话三九居官，即系２７岁就可以有成就。
天庭上连左厢官居极品，日月角耸天非庸凡相。
天庭上连左厢，天庭即系天中位置，上连左厢，其实系天庭左右两个位，一个系高明，一个系高广，天庭同呢两个位相连，就系天庭饱满由来，官居极品就未必，但系出身好就肯定。日月角耸天庭即系天庭饱满范围更加大，额头平满的位更大，形成天庭广阔，一定唔会系普通人。
天府房心看宦途名利皆可问，战堂驿马如立壁忠义不须疑。
天府即上二府，上二府即系理财性，房心系包括埋眉尾与髮尖距离，呢个位阔同埋财性饱满表示个额一定唔会窄，有呢先决条件就可求名求利。战堂即系前额，额如壁立就一定忠心，唔一定系对某一个人忠心，或者对集团、党、国家忠心，亦都代表对自己所做，行业忠心，唔轻易放弃，加上驿马亦够直，表不就算离开佢公司都唔会出卖以前公司，加上口形靓，就好有口德。
司空额角如立壁为社稷之臣，上少府丰俱隆应徵贤之认。
司空即系２２岁位置，同额角位置，壁立即系饱满，多数都系做政府工，而且可以做到退休机会好大。上即系２９、３０，少府即系眉山上面位置，山林位加上眉角上面相连饱满，多数都系社会上面首长，社会上面社团首长，亦都表示呢个人爱出名，但系唔会太孤寒。
司空平满神光藏，日月丰隆驿马肥。
司空２２岁，在面部正中第四个位，有骨起而隐隐约约有光就系最好，就算唔饱满都要平满，平正，唔可以有纹破，如果有唔好色主有突变事件。日月即系日月角，在眉头之上，丰隆唔系见骨，加上驿马位高，代表呢个人有父荫，少年得志，主出外留学。
双林丰满多逸乐，边地骨起足威权。
双林系２９、３０，左右山林、眉角上方，又叫福堂，又叫驿马，于十二宫之中系迁移宫，呢个位丰满无破，主能够安居，唔使成日搬屋。边地即系边城，２３、２４，左右边城，即系山林外边两侧，有骨起显贵，好容易升职，多数系武职，如果色泽明黄，主远行有利。
中正耸额官高禄厚，龙角插天辅弼良臣。
中正在前额正中部位第五位，司空位下面，印堂上面，在十二宫之中叫官禄宫，所以特别重要，人一生事业都系呢度表现出，呢个位饱满就容易身居高位，但系凹陷再加上有点，做就必定多挫折，有班痕破纹，容易若官非。龙角即系天庭１９岁，１８、１７岁的总称，呢三个部位合而为一，隐隐约约见有条气向髮脚位上升，就叫做龙角骨起，如果色明润，就一定身居高位而顺利，如果颜色灰暗，就算身居高位都容易俾人笃背脊。
虎眉凸起连牛角社稷无危，辅骨巍峨向悬角山川永固。
虎眉连牛角即系眉骨连日月角，似牛角就系向头顶直冲而上，有呢形格一定系武将，相传明末名将袁崇焕就有呢种相格，后来崇祯佢杀，明朝就跟住亡。系讲左古边城位置有棋纹相连而无破，就一定身居武职，如果高职就一定边城骨凸起，而又有棋纹相连，如果只系有骨起而无纹相连，就只系武职，唔会系高职。
福堂横连太阳穴中贵早发，华盖横入后脑骨小贵亦荣。
古书上面一个位置有好多唔同名，呢度福堂即系左右山林，２９、３０部位，如果同太阳穴相连就主少年发迹，贵就未必，一定要睇埋中正位。华盖在２９、３０位置后面，一般都系俾头髮遮住，有头髮脱落就容易见到，有条骨伸向后脑，呢人好够，可能系做贼都唔定，所以重要睇埋个鼻够唔够直。
印阔颧开福禄堪夸，双中丰满慧性可羡。
印堂在面部中央，山根之上，两眉中间，亦叫明堂，在十二宫之中叫做命宫，系人元气精神凝聚部位，亦都系脑髓位置，道家特注重呢个位置，叫做上丹田，呢个位宽阔饱满，颧开即系有肉面阔，通常都较为够运。双中即系１６天中，２５中正，丰满，在细路期已经好聪明，但系大之后聪明与否就要睇印堂位够唔够丰满，无论点，细细个时候都好得人钟意。
根印太窄子晚妻迟，悬边昏沉人亡家破。
根印即系山根印堂，太窄表示器量浅，加上眉心窄代表无贵人，同埋人缘唔好，性格唔够开朗，结交朋友机会就会小，结婚迟，生仔迟就系正常。悬边即系２９、３０、２８三个部位，在额上成倒三角形，换句话讲即系额头黑，家破人亡就未必，但系都衰到好紧要。
刑印光明讼厄永绝，嫔奸暗惨妻妾烦忧。
刑，系刑狱位，在印堂两边，眉头位置，印，就印堂，呢两个位明亮就唔会有官司，一望埋去成个位好明亮，唔使讲话无官司，当时重好好运添。嫔门在奸门上指位，表屋企里面女人，奸门代表妻子，如果系女人奸门上隻手指位，就代表屋企里面男人，奸门代表丈夫，呢两个位灰暗就代表屋企里面男人或者女性令到自己好烦恼。
鱼尾拂天仓贵而且寿，奸门平眉骨财禄两全。
眼尾向上，或者鱼尾纹向上，眼尾上弯，表示呢个人性格好开朗，鱼尾纹向上，直达天仓位，呢个人行为好正派，但系要向下纹短过向上纹，或者小过向上，如果长过或者多过就性格同行为都有问题。奸门平眉骨即奸门饱满，奸门饱满必得贤内之助，即系话得到异性助力，通常都当作得到妻子助力，其实呢个位系无分男女。
山根见伏犀青云直上，天井接天仓财禄同探。
山根见伏犀即系鼻梁位隐约有一条气向上冲，表示呢个人际遇好好，做职位好高，又不断有好机会。天井位在天仓后面近髮际位置，天仓系埋财位，淨系理财位平满，只不过系识得管钱，同埋可以将钱养大，但系积唔积到就要睇天井位，亦即系玄武位平满无破损，表示搵得到同埋剩得到。
灶上屯仓不可空，半生衣禄在其中。
灶上即系鼻孔，屯仓即系鼻孔下面横肉，俗称门槛，空即系无条横肉同埋向下陷，如果系咁样晚年衣食就会差。如果加上食禄仓薄，就更加身体唔好，如果话成个晚年就言过其实，应该系六十前唔聚财就准确。
准隆梁直人无毒，面肉横生性必凶。
准：读音绝，准隆即鼻头有肉，梁直即系鼻直，鼻又直，鼻头又有肉，呢个人处事正直，心地又好，但系作为管理人就唔系咁理想，心地太软，鼻头尖就有原则，只要唔抑露孔，就唔会偏私。面肉横生即系颧骨横露，颧向横生必定野蛮，如果加上露骨就唔止野蛮，重运恻忍之心都无埋，性格横蛮无理夹心地唔好。
口阔唇方生来食禄，口小唇薄爱说谎言。
口阔唔系一味大，要有条件，就系口阔要配四方形口，所谓四万咁口，有呢口形就一生都人缘好，搵食就容易，但系亦都要口唇较为厚。如果口大而薄，讲野尖酸克薄，就自然人缘唔好，唔好讲话食禄，就连两餐都有问题。唇薄就口舌招尤，口大就钟意讲，唇薄亦都钟意讲，但系口细而唇薄，讲唔负责任，钟意讲大话，如果系女人，就德行都有问题。
十三气势分析
第一天中对天岳，左厢内府相连续。
天中即系１５岁位，一定要无美人尖，呢个位平表示呢个人性格好通情达理，如果饱满高起就主少年运好，少年运好唔好，呢个位系先决条件，最紧要就系唔好后斜，呢个位置越饱满就越多人提，有同埋有「啦」都差。天岳又叫刑狱，在印堂两侧，系额部最低位，天中相对呢度系一条直线，如果天中饱满，天岳多数都靓，天岳个位唔靓就容易招惹无谓是非，就算眼尾下垂，好怕事，是非都会走惹你，，左厢内府系天中侧边第二隻手指位，左厢左边，右厢右边，天中系１６岁，所以如果有纹有表示屋企里面一定有嘈吵令佢唔可以专心读书。
高广尺阳武库同，军门辅角边地乐。
高广天中左右两边，天中两边各分九个部位，一隻手指位约佔两个部位，左右一样，顺序为天狱、左厢、内府、高广、尺阳、武库、军门、辅角、边地，呢度话高广、尺阳、武库同，高广代表掌权，有缺陷就表示容易失去权力。尺阳代表执行任务时候安全程度，呢个位置系天中同额角中央，如果有纹有晦暗之色，出外工作就要小心，武库绝不宜有，如果有或晦暗表示从事武职就会多意外。军门亦系代表武职，但系同权力有关，辅角同边地即系额角最高位置，亦系额边一隻手指位，如果呢个位凹陷，想升职就好难，如果饱满就表示有异路功名，色暗就小心出外做事安全，如果天中横向后面一半都呈现暗色话，就唔好讲出外做，就连出外旅行都有问题。
第二天庭连日角，天府房心父墓约。
天庭左右共有九个位，左边有日角，右边就系月角，跟住就系天府房心、父墓、上墓、四杀、战堂、驿马、吊堂等九个部位。呢度主要系讲天庭，其他部位都系辅助天庭的，首先天庭一定要同日月角相连饱满，主幼年有父母福荫，最忌有纹破，如果有气直冲印堂主一路顺风顺水，无乜阻力，如果淨系日月角凸表示呢个人聪明但系好难教，天府日月角侧边，如果日月角太高，天府位就低，呢个位低或色晦表示就算有高职位都无运行，亦都表示呢个人系身居高位而唔会体恤下属人，就算屋企都唔会对老婆好。房心呢个位饱满就表示呢个人有为人师资格，如果同日月角天庭相连贯就唔单止做老师，重有可能做国师。如果房心低陷色晦就会有误人子弟情形，父墓呢个位就系睇一个人有无回馈之心，有纹色暗就搵钱唔使俾老豆。
上墓四杀战堂前，驿马弔庭分善恶。
上墓就表示祖荫，饱满表示祖荫得力，如果缺、纹、暗就表示好难有长辈助力。四杀主一个人内在威严，同战堂一齐睇，战堂饱满表示有正义感，有纹色暗主钟意惹事、争讼，但多数输。驿马位平满，迁居远行都系睇呢个位，有明王之色梗系好，色暗就唔好远行，色赤主远行有病。吊庭代表亲人长寿与否，左边代表内亲，右边代表外戚，那一边色暗，表示对你负累，左边吊庭表示内亲去世或者重病，而对你有负面影。如右边色暗表示外戚有病甚至去世，亦都系同你有关连的，如果气色发青就唔系人地事，而系自己的事，病多。
第三司空额角前，上少府位相连。
司空在２２岁的位置，一隻手指位，左右同埋一样，呢个位饱满、光滑就好容易接近有地位人，即系司空侧边一隻手指位要无纹，无破就可以成日接近有力人士，如果有纹破就好容易有官司问题。如果有纹侵入，加上理财位凹，就一定因争讼而破财，如果有纹而加上鼻颜色唔好，就可能失职，或者为官者会降职。上少府系代表容易接近贵人。
交友道中连额好，重眉山林看隐贤。
交友同道中呢两个位要同驿马一齐睇，如果饱满无纹破，驿马位色好，就会有朋友之助，包括去远行顺利，交友故名思义就真系讲交朋结友，如果有少少纹就最唔好，在段时间就真系会误交损友。道中就系去第二度途中，呢个第二度一定系要离开自己于生活地方，如果有纹，尤其是系小毛毛纹就最差，表示出外途中有唔愉快事出现。重眉出林两位饱满、靓就表示个人有勇气，但系过于饱满就会变成俾气差，有缺就横蛮。山林呢个位应该系头髮边一隻手指位，无破就表示呢个人性格好随和，如果凹陷就会流于小器。最后到隐贤，呢个位饱满对自己名气好重视，等閒唔会做损害名气事。
第四中正接龙骨，虎眉龙角及辅骨。
呢度中正接龙骨唔，因为中正自己有名叫龙骨，２５岁至２８岁，年年都有职升，呢度饱满明亮就做好容易升职。应该系中正接龙角，虎眉即系虎角，亦即系中正位两侧一隻手指位，通常呢个位饱满主有权力，如果你色好主有远行升职，如果额头黑就梗系差，但系通常都唔会成个额头黑的，因为基于面无全色基本条件，一定要判断某一个部位，亦都唔系真系要黑先至衰，只要小小青暗就会有麻烦，辅骨即系中正第二隻手指位，系话呢个位平满对做事职位会高，亦即系话中正位最少都要有两隻手指阔度饱满，呢个位饱满就有人提，所以中正位好紧要
悬角斧戟井华盖，福堂交外鎌色恶。
一路向额边伸展，主一个够唔够，呢度系眉山上面位置，华盖主宗教或者正邪之事，或者鬼神之事过于高或过陷都主人性格迷信，福堂主福禄之事，红润就有喜事，但系唔系自己喜事或家人喜事就要睇埋其他部位，如果福堂部位红润加上鼻梁色明亮就一定系自己有喜事，如果眉明润就主兄弟有喜事，如果卧蚕红润就主儿女有喜事，如果未结婚，就一定系男女之事。如果奸门明润就一定系夫妻间的喜事，郊外就真系主出外之事，呢度唔系讲旅行，而只系讲去平时少去地方，嫌色恶即系气色青蓝就要小心，如果髮脚茸毛多都有问题，呢度近髮边就较为难睇。
第五印堂刑狱起，相接蚕室林中纪。
印堂又叫做命宫，平满如镜，一生都好运，呢度系面相十二宫之一，系最紧要部位，气色青暗就会有大问题，一定系造唔顺利，呢度原则上系唔会光的，其次就系忌横纹，忌无端有痣，有暗疮，表示当时所谋事肯定唔成功。刑狱又叫交锁，贴住印堂位系印堂辅助位，最忌由印堂有纹伸入，就容易惹官司。蚕室紧贴住刑狱，叫得做室就一定关系屋企里面人际关系，呢度系眉头位置，如果眉头生得过低或者眉头有倒毛，就一定系屋企里面出现好多麻烦。林中眉四分一位置，呢度代表一个潜在能力，在恶劣环境之下会唔会气馁，呢度系同蚕室一齐睇，如果呢个位生得好表示唔如意时候有家庭支持。
酒樽神光及嫔门，劫门巷路青路里。
酒樽就真系睇饮唔饮得，要配合神光一齐睇，神光系讲理性化，无纹破就表示饮酒唔会乱性，如果呢度层皮好薄，就容易酒后乱性。嫔门系讲同异性相处，如果有什毛，就同异性相处无咁容易相熟。劫门、巷路、青路呢三个位都系关于安全性的，劫门系人身安全，位置眉山之后，眉山后一隻手指位，千祈唔好凹，如果凹陷有纹，眉有破，就容易遇到死牛之事。巷路就代表一个人出入平安，最唔好就系有栋企纹，就真系出入唔得平安，例如行路无端端跌倒，青路系讲出入公门，如果眉尾位凹或有青暗就最好避免出入公家地方。
第六山根对太阳，中阳少阳太阴望。
山根在面相十二宫里面系疾厄宫，主宰一个人健康、波折、决断能力，四十一岁之后运气，一个人领导能力，亦都系财富来源，山根系束龙位，如果山根厚，表示财源顺利，有横纹就表示有波折，如果山根冲上印堂，代表有贵人提。太阳、中阳、少阳系左眼，太阴、中阴、少阴系右眼，就系呢度话太阴望，眼睛瞳人细，眼一定藏神，３７、３８岁一定有大发展，眼尾向上就唔会性事，，呢度太阳、中阳、少阳系左眼成隻眼位，相对于右眼太阴、中阴、少阴亦都佔晒成隻眼位，如果两隻眼眼尾都向上就表示３９、４０可获大利，但系如鸳鸯就呢两年都唔会有好运，因为眼部一定要对称，如果唔平衡就两年都差，如果太阳太阴低陷就３５、３６会有破败。
鱼尾奸门天仓接，天井天门元中藏。
鱼尾、奸门系同埋一齐推断，要求系无纹，平满，可得配偶助力，以前就集中男性方面，呢个位好就有贤妻，现在好多女人呢个位生得好都得到好老公。天仓就系我俗称理财位，饱满就容易到财禄，低陷就好难有钱剩，搵得到都剩唔到，呢个部位包括埋天井、天门、中元（又名玄武）。天井系主偏财，有无横财亦可以睇天仓范里面。天门同玄武（元中）系一齐，代表有无朋友的助力，亦要相关部位配合，就系眉尾够结实就表示唔单止朋友多，重系有力添。
第七年上夫座参，长男中男及少男。
年上系鼻梁位，与泪堂平衡，多数呢度都有节位，如果系见骨就有波折，如人为婚姻事烦恼，男人就为钱烦恼，如果唔露骨就表示有侵咯性，进取性。如果有纹，在上半部就主内亲有问题，如果下半部就主外戚有问题。夫座在年上滑落鼻侧位，呢个位低陷主有桃花，男女都一样。夫座系女相名，而男性就叫妻座，除低陷主多桃花之外，亦主多指背，无论做得点努力都好，都好难得到讚赏，重兼夹多人笃背脊。左眼长男、中男、少男包括在泪堂，卧蚕位里面，而女相就右眼代表长男、中男、少男，代表有无拍拖，结婚之后就代表仔女好与坏，年轻时主仔女健康，晚年就主仔女对自己点样。
金匮禁房盗贼动，游军书上玉堂探。
呢几个位该一齐睇，眼肚位置平满有光泽，就好难会遇到盗贼，但系眼肚位置灰暗，加上有直纹或乱纹，就好大会遇到贼劫，最常见就系俾人打荷包。游军在眼白对下，呢个位相应额角驿马位，驿马位系决定有无运行，而游军就决定远行会唔会有阻滞呢度主要系睇色如果色暗就有阻滞，但系未至于有意外。书上位置奸门下面，系代表文件上事，如果发觉呢个位有暗疮，就要小心文件上会有错漏，例如唔记得交费，或者签错名等等。玉堂就系权插天仓位，系代表行使权力，最忌下陷，有权骨而呢个位低陷，表示有权力欲而无行使能力。
第八寿上甲匮依，归来堂上正面时。
寿上鼻梁位置，年上之下，代表外戚，虽然叫寿，但系同长寿与否并无直接关系，如果色暗就代表屋企里面女人有麻烦，其实应该系老婆外家麻烦。甲匮亦叫财库，鼻翼上方，一定要饱满先至代表有才干，低陷就唔慌会有才干。归来代表有无馀钱，系勺陈位下方，色好亦代表有远方信息。堂上正面两位一体，眼下吋半左右，亦都叫禾仓，中年运就除睇鼻之外就要睇正面呢个位，呢个又系正权骨位，银匙歌里面有云：「中年仓库看禾仓，禾仓有陷无馀粮」，又有一句「更有禾仓陷一寸，中年犹未有夫娘」，最忌低陷无肉。
姑姨颧势好兄弟，外甥学堂命门基。
姑姨同颧势亦代表外戚力量，再加埋外甥呢个位，好多人面中线位有横纹，就表示佢成日都受外戚左右，自己主意时候就自然好多唔等使人加意见，令你左右为难。兄弟又真系代表兄弟，呢度一堆名辞其实就系面珠位，呢度饱满唔单止相貌靓，重好得人缘。学堂位置耳前髮脚前一手指位，饱满就多数都可以读得成书，如果见根就读书好难有成。命门即耳门前一手指位，命门色好就表示精神饱满。
第九准头兰廷正，法令灶上宫室盛。
准头系财星尖端，山根就系财星来龙，所以睇准头一定要自己来龙，来龙窄准头可以尖，来龙厚准头一定要圆，但系无论系尖或者圆，皮一定要厚，如果皮薄就讲乜都多馀。兰廷即系谏台，廷颌两边鼻翼，要厚要够阔，够阔就财运好，够厚就手段光明正大，如果又薄又窄，气量浅，好多事都弄巧反拙。法令要４５岁后见到就最好，太早见法令就辛苦，女人就老公辛苦，两条纹开阔就有权威，有人缘，过深性格顽固，过浅未有法令作用，断续表示脚有问题，同时一定要过口，唔过口就锁唔住水星，讲唔负责。灶上即系鼻尖横肉，系睇一个人到老时候有无积聚，如果无呢条肉，就容易俾亲人劫财。宫室系鼻周围颜色，有微血管见到表示夫妻感情唔好。
典御囤仓后阁连，守门兵卒及印绶。
典御法令侧边两隻手指位，系指出外适应能力，亦都代表对环境适应性。囤仓系面部中间，即系酒涡位，通常有酒涡人老就要为儿为女心。后阁接近牙较位置，通常食时候呢度会郁，越系郁动就表示唔可以坐定度做，一定要周围走。兵卒同印绶两个位一齐睇，贴近耳仔位置，呢个位低陷就想指人做都好难，如果加上食指短就好难身居高位，呢度几个位置都系以气色为主，最好唔俾头髮盖住。
第十人中到井部，帐下细厨内阁附。
人中标准系长、阔、深、正中、有沟壁，代表仔女多少，女性就代表生产能力，忌短、浅、歪、窄，如果青年人无人中，多数都要领养他人之子，人中无毛子亦少，亦代表管理能力低。井部包括仙库、食禄仓，一定要厚，薄亲就身体有问题，牙力亦唔好，如果笑时候缩上去，到老可能要捱饿。帐下、细厨、内阁，系法令插穿而过位置，如果法令呢度开而入口话，想唔饿死都唔得，最唔好就系有粒痣，所谓美人痣，就一生都会卷入多角关系之中。
小使还当妓堂前，婴门博士悬壁路。
小使妓堂同埋一齐睇，系代表有无使人命，配合奴僕宫够唔够饱满，如果奴僕宫有纹或凹陷而小使妓堂平满都有补救能力，如果连呢度都有横直纹破，想工人听话就好难。婴门博士同埋一齐，位置牙较前面，代表有无一技之长，如果食时候呢度向内凹，就表示呢个人无乜特别技能，可能系週身刀类。悬壁位置咬凸起位，如果咬唔凸起，到老身体一定多病，如果太过凸，呢个人时刻都谂住作反的，亦可以话成日都谂住点样去「发围」不甘心居人之下。
十一正口阁门对，比邻委巷通衢五。
口唇厚薄均等，两角向上弯性格优良，有正义感。唇薄而无稜讲唔负责任，口角圆而厚，欲念旺盛，体形细而口大就主容易出人头地，体形大而口小就性格保守，气量浅。阁门位置口角，好多人口角都有一旧肉，口角有一旧咁肉，呢个人就一定讲好有威严，如果加上法令够深，唔止有威，重有权力。比邻阁门侧边，书上话「比邻平满必有芳邻」，呢度有横纹，就一定同隔离邻舍嗌咬。委巷通衢呢两个位代表出入，代表年老时候出入平唔平安，如果有纹有痣就要小心行路容易有意外。
客舍兵兰家库中，商旅生门从续继。
客舍系代表一个人唔好客，如果有皱纹，呢个人就唔多钟意招呼人番屋企。兵兰同家库一齐，代表呢个人对门户小心程度，如果呢个位好饱满，就算落楼下信都要锁晒所有门先至放心。商旅生门代表做生意手法，呢位近腮边牙较部份，如果皮包骨表示呢个人营商未必会正当手段。从续牙较位耳下面，系代表持久力，做会唔会三分钟热度。
十二承浆居宅安，还有外苑林苑看。
面上任何部位都唔主张凹，但系人中同承浆就要有凹陷。人中饱满就生殖能力衰退，承浆饱满到老会无积聚，但深得太窄主呢个人又孤寒，加上理财位饱满，就更加一毛不拔。居宅承浆侧边，呢个位就应该平，亦即系话承浆凹位置唔可以太阔，如果太阔就会影呢个位置，因为居安呢个位系代表可唔可以长期住一间屋，搬屋机会多唔多。外苑同林苑即系咀角过，通常住村屋而有花园，呢个位置都会靓，但系依家好多深圳有屋人呢个位都好靓，就同有无钱关系唔大。
下墓庄田酒地上，郊廓荒丘道路寒。
下墓系代表墓地好坏，呢个位无纹无，可以预知自己会有一个好墓地，古时人对自己将来墓地系好重视，所以先至有一个部位专表示自己来墓地。庄田同酒地系代表６０岁之后生活系频扑抑或优柔，古书话庄田平满安享天年，所以呢度无乱纹就表示晚年生活安定，而酒地就系顠示食能力，要同食仓一齐睇。郊廓系代表六畜平安，依家好少有六畜，而系养宠物多，呢个位皱皮有纹话，就算养几条鱼毛仔都要游背泳。荒丘、道路系表示老年人行路安全程度，位置近腮边，老人家容易跌倒就系呢个部位薄而见骨，上车落车都要小心。
十三地阁下舍随，奴僕堆磨坑堑危。
地阁要求系无纹，肉厚，圆或者方都系好，地阁圆就表示性格较为和顺，地阁方就表示性格较为执著，如果方而凸出就钟意理事，因为地阁系代表实行能力，最忌向后缩、薄、尖、露骨。下舍应该同奴僕一齐睇，有横纹就想有人听你话都好难，重兼好容易俾人累，如果咀角有直纹就好，法令够长就好。确磨系种工具，以前就系生财工具，依家亦都代表生产工具，呢个位置同眼成直线位，如果有暗疮就所用工具会时时坏，就算电视录影机都会随时坏。坑堑应该系依家围栏，有暗色表示住地方会有损坏，依家最常见就系水喉坏。
地库陂池及鹅鸭，大海舟车无忧疑。
地库又叫地仓，呢个位丰满系好紧要，因为呢度系成个腮边中间位，所以呢个位丰满就可以令到侧边几个置都连带好埋，但系都要配合天仓丰满，地阁有肉，就应古书上地库圆阔，家有馀钱，如果人肥而地库薄就晚年好极有限。陂池，鹅鸭近腮骨位，但系要配合酒涡位睇，有酒涡系唔好。陂池、鹅鸭薄而有酒涡就想有钱剩都难，如果陂池鹅鸭厚而有酒涡就表示仔女唔得力，如果加上子女宫差，就仔女就一定走入歧途。大海舟车就系耳后见腮位置，呢个位如果皮薄见骨就主远行失利，尤其是移民系最。如果驿马位薄而陷就唔好讲话去移民，就算去短线旅行都会有唔愉快事发生，例如遗失行李，或者与团友嗌交。
相关文章
